الحلقة الخامسة عشر: الخطوبة و الفرح

[Nariman Nagui]

توقفنا الحلقة الماضية عند الخطوبة و قلنا انه يجب ان يكون فيه وسطية أثناء فترة الخطوبة " بين التضييق والانزلاق"...



فهناك ضوابط شرعية يجب أن تحكم فترة الخطوبة:



1- المقابلة في وجود محرم من أهل العروسة



2- الخروج في وجود الأخ أو الأب.... ياريت ياأهل العروسة تكونوا كرماء معها... وتحاولوا تفضوا نفسكم شوية عشان تقدر تخرج مع عريسها و يتعرفوا علي بعض...




3- اللمس: لا يحل لرجل أن يلمس امراة ليست من محارمه....




سلبيات فترة الخطوبة: بعض الخدع التي ينخدع بها المخطوبين



1- خدعوكي فقالوا.... خليه زي الخاتم في صوباعك....


فتبدأ البنت تشد علي عريسها.... و تضغط عليه و تعامل والدته معاملة غير حسنة عشان يكون زي الخاتم في صوباعها.... و نفس الموضوع بالنسبة للشاب الخاطب





2- خدعوكي فقالوا لو مسمعتيش كلامه حيسيبك....


في بنات كثير بتخاف انها لو متجاوبتش مع خطيبها في الخروج والكلام انه يسيبها... و بالتالي بتنفذ له كل كلامه....


خليكي قوية وكوني انت المتحكمة... ارفضي اي تخطي و تعدي للضوابط الشرعية....


و انت كمان خليك راجل واوعي تطلب منها أي حاجة تغضب الله و تتعدي حدود هذه الفترة....




دي وصيات لكم يا شباب و يا بنات اثناء فترة الخطوبة:



1- الطاعة و عدم معصية الله...


2- الاعتدال في الرؤية


3- البركة


4- حل الخلافات بينكم.. كنوع من التدريب للحياة القادمة.... و حاولوا تختاروا انسان يكون محل ثقة و ذو خبرة... و تستشيروه وتاخذوا رأيه....


5- الكلام في التليفون بان لا تستحي ان حد يسمعه....



و انتم كمان ياأهالي.... حاولوا تباشروهم من بعيد.... زي المدير اللي بيباشر موظفينه دون تدخل مباشر الا اذا استدعي الأمر....




نيجي دلوقتي لمشكلة المهر و الشبكة.... لأننا للأسف احنا اللي خليناها مشكلة....


لأن للأسف أصبح كل واحد بيطلب مهر و شبكة أعلي من مستواه بحجة اننا نشوف العريس ده شاري ولا لأ... و تتحول الزيجة الي شروة... أو صفقة.... فتنكسر حاجات حلوة كثير بين العائلتين....


قال رسول الله صلي الله عليه وسلم:


" رحم الله امراءا سمحا اذا اشتري سمحا اذا قرض أو تقاضي"




و بعد ما اتفقنا علي المهر والشبكة... ندخل علي خطوة مهمة جداااا و هي الفرح و زي ما بيقولوا ليلة العمر....




في أفراح كثيرة حلوة: الناس بتفرح... وبتفرح أهلها.... و بيفرحوا الله ورسوله... و بيحزنوا الشيطان...


و أفراح كثيرة برضه العكس تماما....


أفراح الناس فيها بتعلن انها مش لازم تدين الليلة... وبتنسي الله... بنات بتخلع الحجاب.... و أصحاب فرح دعوا راقصة... أو من يجعل البنات ترقص....


و بيبتدوا يظهروا للناس ان الحياة أحلي بعيدا عن الله.... و انه السعادة في الاسلوب ده....



و صاحب الفرح اللي عمل كل ده هو اللي بيشيل وزر كل النا س الموجودة


قال رسول الله صلي الله عليه وسلم:


" من سن في الاسلام سنة سيئة قله وزرها و وزر من عمل بها"




الحلقة القادمة ان شاء الله سيكون ضيف البرنامج داعية شاب مشهور جدااااااااااااا....




و حلقة 27 يوينو ا.مصطفي حيجاوب في الحلقة عن كل الاسئلة التي وردت علي ايميل البرنامج و من خلال الرسائل الصوتية....

[Maha_ramadan]

قال الحبيب المصطفى (عليه وآله وصحبه أفضل الصلاة والسلام):

((ما بني بناء في الإسلام أحبّ إلى الله عزّ وجل من التزويج))

وقال أيضاً:

((من أحبّ أن يكون على فطرتي فليستن سنتي، وأن من سنتي النكاح واطلبوا الولد فإني مكاثر بكم الأمم غداً وتوقوا على أولادكم من لبن البغي من النساء والمجنونة فإن اللبن يعدي))

وقال عليه أفضل الصلاة والسلام:

((ما يمنع المؤمن أن يتخذ أهلاً لعلّ الله يرزقه نسمة تثقل الأرض))

وقال أيضاً:

((من تزوّج أحرز نصف دينه))

كما قال (صلى الله عليه وسلم):

((من سرّه أن يلقى الله طاهراً مطهراً فليلقه بزوجة، ومن ترك التزويج فقد أساء الظن بالله عز وجل))

* * *
بارك الله فيكم أخي مصطفى وأختنا ناريمان وفريق الإعداد وجزآكم عنّا كل الخير
ويسر لشباب وبنات المسلمين جميعاً ورزقهم السكينة في قربه وقرب من أحبه في الدنيا والآخرة

اللهم آميـن

والسلام عليكم ورحمة الله وبركاته

[د/عابدة لله]

جزاكى الله خيرا اختى
دائما سباقة فى الخير
وجعلة الله فى ميزان حسناتك

[حنين الى الله]

جزاكى الله كل خير وجعله فى ميزان حسناتك
وتحيه خاص للاستاذ /مصطفى حسنى وجزاك الله كل خير

[souad1]

بارك الله فيكم أخي مصطفى وأختنا ناريمان وفريق الإعداد وجزآكم عنّا كل الخير
ويسر لشباب وبنات المسلمين جميعاً

[حفيدة رفيدة]

ماشاء الله الحلقة كانت رائعة
وأستاذ مصطفى ربنا يكرمه كان أسلوبه رائع
والتشبيهات اللي قالها ان الناس بتخلع ماسك التدين او المحجبة بترمي حجابها لأنه خانقها كانت تشبيهات قريبة من القلب أوي
ربنا يهدينا جميعا..حقيقي في أفراح كتير بنشوفها بنحس انها مش أفراح مسلمين
ربنا يبارك في فريق العمل كله
ويهدينا جميعا
ويرزقنا بأزواج صالحين

[المشتاقةلعفوالله]

السلام عليكم ورحمة الله وبركاته
جزاك الله خيرا أختي ناريمان على مجهودك الرائع في ايجاز مضمون الحلقات ربنا يكرمك ويباركلك
وبجد الحلقة النهاردة كانت جميلة قوي وبحمد ربنا انه رزقنا بالبرنامج ومعدين البرنامج ربنا يجازيهم عنا خير وربنا يبارك للأستاذ مصطفى على أسلوبه الرائع وبجد بحس بحرقه في كلامه وهو بيذكر المعاصي وأهل المعاصي ربنا يهدي كل شاب وفتاة مقبلين ع الخطوبة أو الجواز ويكونوا دايما قريبين من ربنا ويقربوا منه أكتر ليلة العمر زي ما بيسموها وان شاء الله الحلقة دي يكون لها ولو صدى في نفوسنا كلنا سواء اننا اللي حنعمل أفراح زي دي أو مجرد الحضور
اللهم أرنا الحق حقا وارزقنا اتباعه وأرنا الباطل باطلا وارزقنا اجتنابه
اللهم اغفر لنا كل ما مضى من ذنوب وارحمنا في ما هو آت وزدنا علما وفضلا وكرما

[oldfashion]

الحلقة اليوم كانت أكثر من رائعة جزاك الله خير يا مصطفي ربنا يباركلك و سدد قولك في الحق
ولكني لي تحفظ عليك في نقطة أرجو منك أن توضحها في حلقة قادمة إن شاء الله
و هي عندما تكلمت عن الأفراح فعلقت والدتي أنك غير صادق في كلامك و ذلك لأني كنت قريبا في فرح و كنت أنت حاضر فيه و لكني أشهد أنك لم تجلس أبدا و كنت تخرج من القاعة عندما يبدأ صخب الدي جي و أبلغتهم بذلك و لكن من الواضح أنها فهمت من كلامك أنك مع الرأي الذي يقول نعتذر عن الأفراح

عذرا أنا أتفهم ما تقوله جداااا و أقدر كل كلامك و لكني فعلا لم يعجبني رد أمي فأردت أن أبلغه لك حتي توضح الأمر و لا تترك مساحة من الشك

[آمال نبيلة]

جزاكم الله خيرا
فعلا تفيدوننا و جدا

[muslima_89]

جزاكم الله خيرا

انا مشفتش الحلقة حشوف الاعادة ان شاء الله

[ساكنة الجنة]

بسم الله الرحمن الرحيم
السلام عليكم ورحمة الله وبركاته
جزاكم الله خير الجزاء عنا وعن جميع شباب المسلمين
والحلقات ال3 اكثر من راااااااااااائعين وبجد غيروا مفاهيم كتيرة عندى شخصيا .. وشجعنى على قرارات كنت بفكر اعملها لكن بخاف ازعل اهلي ... لكن رضا ربي اهم .. واكيد اذا رضي ربي عنى هيرضا عنى الناس فيما بعد...
وقراري الاكيد كمان انه قبل ارتباطي بأي شخص اول حاجة هعملها هدية الحلقات له ولاهلى
جزاااااااك الله خيرا . وجعله فى ميزان حسناتك ورزق الجنان وظل عرش الرحمن

[سما3000]

السلام عليكم ورحمة الله وبركاته

نفسى بجد نطبق الشريعه صح ونسيب العادات الغلط اللى اتربينا عليها دى

والاهل والشباب يشجعونا على كده

وجزاك الله خيرا يا استاذ مصطفى 00

[ساندى]

جزاكم الله خيرا على المجهود الطيب البتعملوه
حقيقى استفدت بكل كلمه اتقالت فى اللقاء وحقيقى بشكر ربنا على نعمه التأثر بالكلام وعدم الجحود والاقتناع الكامل بكل كلمه قالها استاذ مصطفى انهرده نقلا عن اوامر الله ورسوله
فى جزء عجبنى اوى استاذ مصطفى قالو عن ان البنت ال فسخت خطوبتها مش حاجه سلبيه لانو بالمنطق دى فتره تعارف بينهم واننا المفروض منبصش ليها بحاجه سلبيه لان انا مرت بتجربه ارتباط لمده خمس شهور تحت ضغط من اهلى عليه لانهم كانو شيفين اد ايه الشخص دا مناسب وانا من اول لحظه لاخر لحظه كنت مختلفه تماما وللاسف اتخطبت للانسان دا بس الحمد لله انتها الارتباط ودى نعمه كبيره اوى بشكر ربنا حقيقى عليها لان حقيقى احيان كتيره مش بكون مصدقه انى صحيت من الكابوس دا وعشان اكون صريحه معاكو سعات بكون خايه من موضوع عريس يسالنى عن الارتباط السابق برغم ان ربنا يعلم انا اد ايه كنت رفضه الموضوع دا بس بكلام استاذ مصطفى انهرده حقيقى علمنى ازاى ارد بثقه كامله على اى حد ممكن ينظر نظره مش حلوه للبنت ال فسخت الخطوبه حقيقى جزاك الله خيرا وبارك الله واكرمك

[radwa313]

السلام عليكم و رحمة الله وبركاته
انا لست مخطوبة و لكن هذه الحلقة فعلا واضحتلي حاجات كنت كثيرا ما افكر فيها و هو كيف يكون التعامل بين المخطوبين في طاعة الله من كثرة ما اراه حولي لانصح به من يقبلون على الزواج
وخصوصا الفرح فكثيرا ما كان اناس من اهلي يدعونني اني معقدة عندما اخبرهم اني هعمل فرح اسلامي
و بالفعل كان هناك فرح احد معارفنا و العريس لم يرض ان ترتدي عروسته الحجاب في الفرح وهي طاوعته في ذلك
لكن هناك نقطة اريد ان استوضحها هل النساء مع بعضهم من الممكن ان يطبلن وبالطبع وانا اسفة على اللفظ يرقصن دون حضور الرجال طبعا
وجزاك اخي مصطفى كل الخير واختي نريمان وكل القائمين على البرنامج
وباك الله فيكم ولكم وننتظر المزيد

[Noha Ahmed]

بسم الله الرحمن الرحيم

السلام عليكم و رحمة الله و بركاته

السلام على من إتبع الهدى و خشي الرحمن بالغيب

شاهدت الحلقة الخامسة عشر و الحمد لله إني شاهدتها و كانت شاملة و كاملة و بجد أستاذ مصطفى قال الكلام اللي نفس كل الناس الملتزمة أن يقولوه من زمان و ( اللي مستسلمين لله فعلا ) أو اللي لسه متدين وكانوا بيقولوا عنهم متخلفين؟؟؟؟!!!!!!
أيوه كده لازم نطلع للنور بقى وننشر الفكر الصح و إن الإلتزام هو الصح سنين و مجتمعنا في غيبوبة العادات والتقاليد الخاطئة في الزواج و غير الزواج و مظاهر المغالاة و التباهي بدون داعي.
و لو الأهل فعلا فضلوا يزودوا أكتر من كده يبقى العريس هيروح و مش هيرجع زي ما رجع الممثل في الكليب ههههههه.
و أكيد من يعقلوا ويستوعبوا كلام الأستاذ مصطفى هيزودوا نسبة الزواج الصح بإذن الله تعالى و بمرضاة الله وتعالى و رسوله و تزيد نسبة الملتزمين و الملتزمات بإذن الله.
بارك الله فيك شيخ مصطفى و أكرمك منزلة عالية عنده و يجعل من كل قول أو فعل لك و لكل من معك و يساندك حسنة و مقاما بالجنة و نحن معك.

أحب إني أقترح الحلقة القادمة الخاصة بحال المسلمين و بعضهم إزاي نوحد صفوفنا إزاي نشارك فعليا مع بعض في حل مشاكل الأمة الإسلامية داخليا و خارجيا.
لقد لاحظت في مؤتمر العالم الإسلامي الأخير أننا لم نلمس ثمرة هذا المؤتمر حقا نعم أن كل القائمين على نشر و توعية الدين الإسلامي في العالم كانوا حاضرين و بعض الشيوخ الأجلاء قالوا خطابا رائعا و ياريت يطبق و لكن ما أهمية الكلام بدون فعل
( و الله العظيم كان فيه ناس و شيوخ نايمين جابتهم الكاميرا في المؤتمر حسيت إنهم لأنهم عارفين إن مافيش حاجة هتتعمل فا مش فارقة معاهم أو لأنهك إتناقشوا في الكلام ده قبل كده الله أعلم).
و كمان نقطة الخلاف بينا و بين السعودية في الصيام رمضان و هو فرض ربنا ليه نصوم إحنا في يوم و هما في يوم؟؟؟؟؟؟؟؟؟؟؟؟؟؟ياريت نتحدث عن هذا الموضوع و أمثال هذا الموضوع بينا و بين الدول الإسلامية الأخرى. و على دور هؤلاء العلماء الأجلاء في نشر الإسلام و توعية المسلمن في المناطق النائية من العالم و التي لا نعلم عنها شيئا و مش ملموسة في الإعلام الديني أوي مثل منطقة أو قبيلة
(زولو في جنوب أفريقيا) و أمثالها.
مش عارفة مش عايزة أتكلم في كلام أكبر مني و لا أتهم أحد بالتقصير و لكن ألفت النظر يمكن كلامي يقدر يغير شيء إذاوصل للأستاذ مصطفى
والله تعالى أعلى و أعلم
و شكرا أختي ناريمان على تفريغ الحلقة الشامل ده و مجهودك الرائع و ياريت أستاذ مصطفى يتحدث عن الحاجات ديه.

بارك الله فيكم و أعطاكم من خيراته و رضاه ما لايعد و لا يحصى

اللهم صلي و سلم و بارك على محمد عدد من صلى عليه و صلي على محمد عدد من لم يصلي عليه و صلي على محمد بقدر حبك له و على آله و صحبه أجمعين.

[habhob]

انا اتفرجت على الحلقة وكانت رائعة جدا جزاكم الله خيرا و

[معاذ عبيد]

السلام عليكم ورحمة الله وبركاته

استاذ مصطفى فتح الله عليك وزادك حلاوة على حلاوتك


نلخص الكلام:

1- رأى: حضرتك قلت انى يا جماعه عليه انا مش عايز اضيق عليكوا بس احنا عايزين نبقى راضيين لربنا .الكلام ده فيه شوية لبس ...

2-نقد:استاذ مصطفى انت ما حططتش شكل العلاقه بشكل عملى يعنى احنا مخطوبين هانتكلم في ايه ؟....الكلام بعيدعن ارض الواقع.

3-مخالفه: معلش يا استاذنا ان حسيت فى كلامك ازدراء للراقصه والعصاه وهؤلاء بشر ولكنهم عصاه.

4-دعوه من خلال برنامجك:عايزين نطبق بقى الكلام بتاع ربنا واحنا مستمتعين يعنى عايزين نشوف علاقات حققت الكلام ده وهما سعداء ونجحوا اللى عنده قصص زى كده ممكن يحكيها ويقل هو عمل ايه...

نحبك فى الله يا استاذنا

سلام

[battot kimo]

السلام عليكم ورحمة الله وبركات
ماشء الله الله اكبر علي الحلقه فعلا كانت جميله اوووي وكمان زي ما قالت الاخت علي التشبيهات كانت رائعه علي الحجاب وكمان علي الشباب اللي بيرقص فعلا تشبيه جميل جدا لو سمعتو البنات اللي خلعت حجابها وكمان الشباب اكيد هيرجعو علي اللي عملو ان شاء الله بالتوبه
يارب يكرم كل اللي تعبو في الحلقه لتوصيل الحلقه لينا ويجزيهم عنا كل خير

[اريام]

السلام عليكم ورحمة الله وبركاته .اولا انا اشكرك يا استاد مصطفى وكلمة شكر قليلة اوي على الي بتعملو معانا وجزاك الله خيرا حتى بقيت مش عارفة اقول ايه.انا عايزة اسال حظرتك سؤال واستحلفك بالله تجاوب عليه في الحلقة الجاية بادن الله احنا عندنا في الافراح بيبقى فيه موسيقى ورقص وكل ده بس من غير ما يختلط الرجال بالنساء .يعني بيكون فيه صالون لدول وصالون لدول فانا عايزة اعرف ايه حكم ده حلال ولا حرام .وارجوك ترد عليا عشان المسالة مهمة جدا وخصوصا احنا داخلين على الصيف والاعراس كتيرة ومش عايزة اعمل حاجة تغضب ربنا.اسفة على الاطالة وجزاك الله خيرا وشكرا

[هبه صالح]

ماشاء الله الحلقه بجد كانت جميله لدرجه انى اتفرجت على الاعادتين ربنا يباركلك يا استاذ مصطفى ويجعل ثواب كل واحد يتغير بسبب برنامج بتاعك فى ميزان حساناتك ربنا يباركلك بجد جزاك الله كل خير وبتمنى تستضيف الداعيه احمد الشقيرى واتمنى بجد المفاجاه (الضيف)يكون هو فعلا
واتمنى بجد كل اهلينا تستفيد من الحلقه وتعمل بيها وبوجه شكر للمخرج الجميل شريف احمد سمير والاستاذ خالد المهدى على التقرير اللى قاموا بتمثيله شكرا جزيلا لكل فريق العمل

[هبه صالح]

معلش عندى رد بسيط قوى على الاستاذ معاذ عبيد
اولا بنسبه لكلام الاستاذ مصطفى فعلا صحيح والمفروض ده يحصل واذا كان على الكلام ابسط حاجه هو قالها تطمنوا على بعض وبدون الدخول فى كلام يخلف كلام الله ورسوله فى الخلوه
ثانيا صحيح الراقصه وهؤلاء البشر زى ما حضرتك لقبتهم ب(هؤلاء) ربنا وحده هو اللى يقدر يقول عليهم عصاه صحيح احنا بنشوف اعملهم لكن متقدرش تصنفهم تحت مسمى عصاه لان ربنا سبحانه وتعالى غفور رحيم بعباده واتمنى ان حضرتك متضايقش انى عقلت على كلامك بس فعلا محدش يقدر يحكم على حد بتصرفاته ربنا اعلم بعباده اكتر مننا

[nora]

السلام عليكم ورحمة الله وبركاته
جزاك الله خيرا كثيرا يا استاذ مصطفي الحلقات اكثر من رائعة
ربنا يكرمك

بمناسبة موضوع الفرح و الراقصة انا كنت روحت فرح من سناتيت تقريبا و بعدين اكتشفنا فعلا ان في راقصة اتصدمت جدااااااا انا و اختي ما تاخيلتش ان اصحاب الفرح دة يعملوا كدة لانهم ناس كوايسين بس هم كانوا لازم يعملوا فرح عالي شواية عشان كان فية ناس مراكز جاية الفرح :( بس طبعا دة مش مبرر

المهم انا و اختي و اتنين من اقاربي اول لما شوفنا الراقصة داخلة خارجنا علي طول من القاعة
و علي العكس اغلب الشباب و الرجال المحترمين قاربوا الكراسي عشان يتفراجوا

ربنا يغفر لنا جميعا
وربنا يكرمك يا استاذ مصطفي و يجازيك عنا كل خير لانك فعلا سبب في تقاربنا من الله :)

[مريم محمود]

السلام عليكم ورحمة الله وبركاته
الحلقة كانت جميلة جدا وانا كنت محتاجاها جدا لانى الفترة دى قررت اعمل حاجة بس كنت محتاجة ماما تسمع اكتر عن الموضوع الحمد لله الاستاذ مصطفى اتكلم عنه جزاه الله كل خير وربنا يباركله فى عمره واهل بيته وينفعنا بعلمه يارب

[رضوى مصطفى]

:marsa101::marsa101::marsa101:الحلقة جميلة جدا بس انا عايزة اعرف كيف ارسل سؤال على الموقع

[merooo7]

السلام عليكم ورحمة الله وبركاته

كانت حلقة اكتر من رائعة ربنا يجعلها فى ميزان حسناتك يا استاذ مصطفى

وشكرا استاذة ناريمان على التلخيص

[سندس530]

جزاكى الله خيرا
الحلقه دى كانت كتيييير حلو

[درة الكون]

جزاكم الله خيرا كثيرا
وجعله الله فى ميزان حسناتكم
أسأل الله ان ينفع بك الإسلام والمسلمين
وتحياتى للأستاذ مصطفى و أسأل الله أن يديم وجوده على طريق دعوته

[اسمهان]

بارك الله فيكم جميعا..
ما اجمل ان يكون الله دائما حاضرا معنا فى كل خطواتنا .... وقتها سيبارك اعمالنا و يسعدنا فى حياتنا...و يجعل لنا مخرجا لكل شئ:119:
بارك الله فيك مصطفى وفى من معك على كل شئ...
با رب اجعلنا ممن يسمعون الخير يفعلوه....
السلام عليكم..

[eman23]

السلام عليكم الحلقة كانت رائعة جدا وشكرا على مجهود الا ستاذ مصطفى ويارب ربنا يوعدنا بالانسان الى ياخد بايدينا كلنا وكل بنات المسلمين *ويارب يااستاذ مصطفى تيجى اسكندرية تانى *نرجو من اللة ذلك*

[Dr.tota]

والله ربنا يكرمك يا ا مصطفى ويجزيك عنا كل خير
انا واصحابي بدانا نتابع البرنامج بشغف شديد مع بداية حلقات التعارف والخطوبة

واجمل حاجة ان ا/مصطفى بيقول حاجات قريبة مننا اوي.......والله كانه بكلمني في ودني
انا اكتر حاجة كانت عاملة لي مشكلة حتة انه مش لازم يكون متدين اوي وكفاية انه بيصلي ومحترم....لان انا كنت بدور على واحد متدين اوي يا اما بلاش

وبصراحة عندي سؤالين :
انا عارفة انهم متاخرين شوية....بس معلش بقى ظروف الامتحانات

1- ايه راي حضرتك في جواز النت.....اقصد يعني المواقع اللي بتقوم بدور الخاطبة
اصل بصراحة فرصة الاختيار بين المعارف وكده قليلة اوي...
2- موضوع الصورة
يعني ينفع ادي صورتي لحد يشوفها..اصل في ناس قبل كده طلبوا صورتي وانا رفضت.......اصل مش معقول انا كلي كده اتلخص في صورة 4×6 مفيهاش غير عنين ومناخير وبق

ووالله يا ريت يكون في وسيلة للتعارف بين الشباب والبنات اكتر شوية...لان موضوع العارف ده بيضيق الدايرة اوي...هو طبعا كويس بس مش كفاية



وفي انتظار رد حضرتك

[حياه بلا تدخين]

أنتظرونى
أن شاء الله تعالى
مع فريق حياه بلا تدخين
http://img516.imageshack.us/img516/4647/picture115ff6.jpg


أنتظرونى
أن شاء الله تعالى قريبا على الموقع
مع فريقى حياه بلا تدخين
http://img141.imageshack.us/img141/7253/dsc8949ek0.jpg


http://islamroses.com/zeenah_images/XZe56782.gif

[سارنو أحمد]

انا بصراحة كان نفسى تستفيض فى موضوع إختيار الزوج والزوجه أنا مش مرتبطة ومحتارة جدا بالنسبة للى بيتقدملى مش عارفه أختار أو أحط أسس طبعا الأخلاق بس فيه حاتجات تانيه عايزين ترتيب للأولويات يعنى أنا فيه حد متقدملى شاب كويس مكافح بس ظروفه صعبه شوية وأنا محتارة عشان ظروفه ومش عارفه أعمل إيه؟ مستنيه الرد من واحدة من الأخوات أو من الداعية مصطفى حسنى

[ساكنة الجنة]

السلام عليكم ..حضرتك قلت انو مش هينفع نحضر فرح فيه اغانى والهيصة المعروفة فى الافراح من غير مشاركة .. بس فعلا هو ده اللى فى نيتنا مجرد المباركة والتهنئة وخاصة اذا كانوا من العائلة ..
ثانيا:كتير من الحاضرين مش بيبقوا سامعين الاغاني وكلماتها تحديدا.. هم بيرقصوا على الموسيقى العالية والهايصة ايا كانت الاغنية اللى شغالة...
فهل حضرتك تقصد الحرام فى الكلمات؟؟ فهى مش بتتسمع بتركيز.. ولا فى الموسيقى نفسها اللى فى الاغنية ؟؟؟؟
وحضرتك قلت دلائل على تحريم المعازف اللى هي الموسيقى مش الكلمات؟؟؟؟؟
سامحنى واعذرني .. لكن انا محتاااااااااااااارة اذا حضرتك قلت الموسيقى حرام ؟ ازاى حضرتك بتدخلها فى كل برامجك؟؟؟
ثالثا: علاقة ام البنت المخطوبة بالخاطب وليس العاقد.. واب الخاطب بالبنت وهى مش زوجة لابنه؟؟؟
حضرتك ماذكرتهاش فى الحلقات... ياريت حضرتك تعرفنا حدود العلاقة بينهم وطريقة التعامل
لان فى كتيييييييييير بيقولوا ان الخاطب زي ابني وفى عمره ..
وجزاك الله خيرااااااااااا

[wafaa3d]

جزاكم الله خيرا

[maryam112000]

السلام عليكم ورحمة الله وبركاته
جزاك الله خيرا

وفعلن موضوع حلو جدا
وبتمنى من كل بنت انها تسمع كلام الداعيه
لانى كنت مخطوبه وبالبنت فعلن بيتبصلها من ناحيه اخرى
اتمنى من كل بنوته مقبله على الزواج والخطوبه تتقى الله
وللاسف الشباب دااااااااااا متحلو كل حاجه
عفى نفسك اختى الفاضله

وعيزين زوجات صالحات

مثل خديجه وعائشه وامهات المؤمنين اجمعين


سلام عليكم

[عابدة لله]

الله يجزيك الخير اخي مصطفى حسني على هذه الحلقة

عندي سؤالين ,
نحن في الاردن من عاداتنا عندما يخطب العروسين , يكتب الكتاب وتكون زوجته بعدها يكون العرس , وهذا يؤهلهم للخروج معا لكن عاداتنا وتقاليدنا تمنع الخروج لوحدهما اذا لم يكون معهم احد , ويجوز لهم التحدث بالهاتف بحكم ان كتابهم مكتوب , فاريد ان اعرف رايك

اما الثاني نحن نقيم اعراسنا غير مختلطة نساء لوحدهم ورجال ايضا وحدهم , وبالتالي لايوجد عنا ماذكرته , ولكن طبعا النساء تلبس فساتين السهرة , طبعا العرس يكون اهل العريس هم الذين يحيون الحفل وعندما اهل العروس المشاركة تطفئ الكاميرات , ولكن تبقى نقطة ان اهل العلريس الرجال يدخلون الى القاعة ويرقصون مع العريس طبعا العروس تغطي على نفسها ولاتشارك , فما رايك وتعليقك على ذلك

[amra]

بسم الله الرحمن الرحيم
ربنا ينفع بحضرتك ويتقبل منكم ..شكرا على كل التعب ده.....

[رب يسر لي امري]

بسم الله الرحمن الرحيم

الحلقه كانت اكتر من رائعه و كل كلمه كان استاذ : مصطفى حسني بيقلها كانت مقنعه جدا
يا رب الناس تعرف معنى الفرح الاسلامي
و لما نشوف العروسه لابسه الحجاب و الفرح محترم بنحس بفرحه غير
و كده بنثبت و بنقول ان احنا ف كل الاوقات عايزين رضاك علينا يا رب و مش هيهمنا كلام الناس اللي مالوش فايده ..........
ربنا يجزيكي اختي ناريمان كل خير
انتي و استذانا هادينا للخير ( مصطفى حسني ) و كل فريق الاعداد
ربنا يجعله ف ميزان حسناتكم و يجعلكم سبب ف هداية الناس

[poucy_29]

بسم الله الرحمان الرحيم
السلام على من إتبع الهدى و حضرتك منهم
ربنا يكرمك و يباركلك يا أستاذ مصطفى
أعزك الله يا أستاذنا الفاضل و جازاك عنا كل خير
و شكرا جزيلا لحضرتك
و صلي اللهم و سلم و زد و بارك على سيدنا و حبيب قلوبنا سيدنا و حبيبنا المصطفى و على آله و صحبه أجمعين و سلم تسليما كثيرا
و السلام عليكم و رحمة الله تعالى و بركاته
أختك في الله تعالى عبير من تونس

[علياء عمرو]

السلام عليكم ورحمة الله وبركاته
جزاك الله خيرا يا استاذ مصطفى الحلقات كانت رائعة ووضحت حاجات كتير

وانا عندي فكرة كده جديدة بخصوص موضوع الدبل لكي لا نغضب الله ممكن اللي يلبس الدبلة للعروسة والعريس هو اصغر طفل او طفلة (من عائلة العريس او العروسة)
متهيألي هتبقى شكلها جميل اوي لما طفل صغير هو اللي يشيل الدبل ويلبسها للعروسين(ولو ما كنش في اطفال ممكن يبقى مثلا اكبر حد زي جد او جدة او......)
ايه رأيكو؟؟

[طيب وابن حلال]

لخصوص الدبلة من المفروض انها تلبس بعد قراءة الفاتحة واذل قراءت الفاتحة مع الايجاب والقبول صارت صارت الفتاة زوجة الشاب اليس كذلك ؟.فبهذا الشكل يمكن ان يلبسها الدبل.
اذا كان الشاب والشبابة انخطبو وهم يدرسوا مع بعضهم كيف يمكن ان يتعاملوا وهم في تلاقي دائم سوى محاضرات اوغيرها.كيف يمكن ان يتصرفوا ؟
شكراا.

[الأقصى]

بسم الله الرحمن الرحيم
السلام عليكم ورحمة الله وبركاته
أشكرك على الحلقة وجزاك الله خيرا أريد أن أوضح عن سؤال الاستفتاء لهذه الحلقة (الخامسة عشر) وهو أن الأفراح أو الحفلات تختلف من بلد الى اخرى ففي بلدي عموما تنقسم الأفراح الى مختلطة وغير مختلطة وفي كلاهما رقص الا أن الفراح الغير المختلطة يجلس العريس في قاعة النساء بحيث يتم الرقص والاحتفال من قبل قريبات العريس اما المختلطة فهي كما تعرفون فالكثير قد يشارك في الافراح الغير مختلطة ولا يشارك بالنوع الاخر
http://www.mustafahosny.com/forum/islam way.com

[mariam alsalihy]

السلام عليكم ورحمة الله وبركاته
كانت رائعه جدا وشكرا على مجهود استاذ مصطفى حسني وناريمان والمساعدين
وان شاء الله في ميزان حسناتكم وبالموفقيه

[ابو مجاهد]

طبعا والله انو برنامج رائع واسلوبك بالكلام كثير جميل والى الامام يامصطفى حسني

[ahmed attia]

جزاكى الله كل خير وجعله فى ميزان حسناتك
وتحيه خاص للاستاذ /مصطفى حسنى وجزاك الله كل خير

[فاطمه امة الله]

السلام عليكم ورحمة الله

مشرفتنا الفاضله اريد ان اعرف من حضرتك شئ مهم

هل كل ما نكتبه هنا يقراه فعلا الاستاذ مصطفي ويرد عليه

للاسف انا عن نفسي لا اشعر بذلك

لاننا من قبل كتب الكثير ولم اسمع الاستاذ مصطفي يتكلم عنه..

منتظره رد حضرتك لكي اشارك واكتب النقطه التي تستفزني في الاخوه العرسان :icon_razz:

[cat 9]

جزاكى الله خيرا اختى ناريمان
وكنت عايزة اقولكم انى ملاحظة ان كتير من العرايس بيشيلو الحجاب يوم الفرح
وكدة بتغضب ربنا عشان سعادة وهمية وليه يبدأوا حياتهم بمعصية :022:
يا رب اهدينا و اهديهم

[ابو ايمان]

اللهم اعطفى مصطفى حسنى الصحة والفافية امين يارب العالمين

[jojo.G]

السلام عليكم ورحمة الله وبركاته


اخواتى لو سمحتم انا عاوزه اللينك اللى اقدر احمل الحلقه دى بتاعت التعارف والخطوبه والخطوبه والفرح لانى دورت عليهم كتير واللينك مش كان بيفتح ارجوكم ساعدونى

وجزاكم الله كل الخير

[soad yahia]

السلام عليكم انا اول مرة اشترك في منتدي انا مش عارفة اسمع ندوات الاستاذ مصطفي عيزة حد يساعدني وجزاكم الله خيرا

[soad yahia]

السلام عليكم انا اول مرة اشترك في منتدي انا مش عارفة اسمع ندوات الاستاذ مصطفي عيزة حد يساعدني وجزاكم الله خيرا وعندي اسئلة للاستاذ مصطفي, هل الاستاذ مصطفي بيشوف كلامي وممكن يرد على الاسئله اللي هكتبها. حفظك ربى

[ريهام عبد الحميد]

بارك الله فيك اخى الاستاذ مصطفى وجعل مجهودك الرائع فى
ميزان حسناتك

[ريهام عبد الحميد]

من يتقى الله يجعل له مخرج ويرزقه من حيث لا يحتسب
فأن برضى الله عز وجل تكون حيتنا كلها بهجة وسرور وافراح
ان شاء الله تعالى